Ek din shafeeq school se ghar waapas aaraha tha tou usnay dekha ke uskay chand saati gulayl (slingshot) se birds ka shikaar kar rahe thay. Unki ye harkat usay buri lagi. “aakhir kya bigaada tha inn nanhi munni birds ne…!” usnay apne dosstoun ko samjhaane ki koshish ki, jispar sab ne uska mazaaq udaane lage. Ek ne kaha. “shafeeq! Tum bey’hadh darpook hoo, shikaar tou bahaddur loog khela kartay hain.”
Shafeeq ne unhi samjhaaya ke wo darpook nahi hay balkay reham dil hay, iss liye chotay chotay parindoun ka shikaar usay pasand nahi, haan! Unn qatarnaak jaanwaroun ke shikaar se usay zaroor dilchaspi hay, jo insaan ke dushman hain aur jin se aam taur par insaan ko nuqsaan pahunchta hay. Shafeeq ki baatein sunkar bhi uskay dost baaz nahi aaye aur unki gulail (slingshot) masoom birds ke khilaaf barabar chalti rahi. Ghar waapas jaakar shafeeq bahut waqt tak udaas raha. Uski samaj me nahi aaraha tha ke apne saatiyoun ko bey’raham kaamoun se kaise baaz rakhein.
Khuda ka karna ye huwa ke doosre hi din unhi naseehat hoo gayi. Shafeeq ke saat ek ladka shahid padhta tha, wo tha tou behad zaheen laykin sharer bahut tha, har waqt usay kisi na kisi ko sataane ki fikr rehti thi, uski pocket me hamesha gulayl rehti, wo ameer waalidein ka beta tha lihaaza jab wo ghar se nikalta tou doo chaar dost saat hoo laytay. Unka school iss small town ke last par tha, uskay aagay jungle tha, wahan qatarnaak jaanwar nahi thay laykin phir bhi bacche khayltay koodhtay, uss taraf thoda kam hi jaatay thay.
Ek din school ki leave ke waqt shahid ne doostoun se kaha. “bhai aaj ghar jaane ke bajaaye jungle ki sayr kartay hain.” Ye suntay hi uskay saati fauran tayyar hoogaye. Unhoo ne shafeeq ko bhi daawat di laykin usnay inkaar kardiya. Awwal to usay shareer ladkoun ki suhbat bilkul pasand nahi thi aur doosre waalidein ki ijaazat ke bagair wo kahein nahi jaata tha. Ek baar phir uska mazaaq udaakar ye shareer ladkay kandhoun se kitaaboun ke bastay (bag) latkaaye school se nikle aur cheeqte chillatay, kheltay koodhtay jungle ki taraf rawaana hogaye. Raaste me unhi jo bhi parinda nazar aaya, uspar gulayloun se zaroor hamla kartay. Aksar parinday unhi dekhtay hi furr hoogaye laykin baaz kamzoor birds shahid ki gulayl ka nishaan bhi bangayein. Jab wo farmhouse se hotay huwe sunsaan jungle me enter huwe tou sham ke 4 baj chuke thay. Har taraf sannaata tha, kabhi kabaar kisi parinday ki aawaz aajaati warna siwaaye un ladkon ki cheeq o pukaar ke aur koi awaaz sunayi nahi dayti kyounkay uss taraf aabaad na hoone ke baraabar thi. Chaltay chaltay wo jaise hi ek baday daraqt ke paas pahunchay, unhi ek bahut beautiful colourfull bird nazar aagayi, jo ek tehni par beythi apni nanhi si dum hilaa rahi thi. Uskay rang itne haseen thay ke dekhtay hi sab bacche khill uthay. Shahid ne fauran apni gulayl uthaayi lekin shakeeb ne usay rooka.
“nahi shahid! Khuda ke liye isay baqshdoo.”
“kyoun baqshdoun? Shahid ne poocha. “tumhaari paaltu hay kya?”
“nahi bhai, dekhtay nahi ke kitni pyaari hay aur kitni nanhi munni si hay.” Shakeeb ne jawab diya. “bakwaas band karo, ye sab jangli parinday hain, allah ne inhi paida hi iss liye kiya hay ke insaan inka shikaar karkay ji behlaaye. “shahid ne kaha aur fauran apni gulayl se uska nishaana banaya. Phattar abhi gulayl se nikla na tha ke chidya phir se oudhgayi aur shahid ke friends ne zoor zoor se hasaa. Ab to shahid ko gussa aagaya aur wo tezi se uski talaash me aagey badhgaya. Uskay saat tamaam saathi bhi cheeqtay chillaatay apni gulaylein taanay shahid ke peeche chaldiye. Thodi daer ke baad yakaayak ek ghanay daraqt ki tehni par unhi wo rangeen chidya nazar aagayi. Usay dekhtay hi shahid ke sar par bhoot sawaar hoogaya. Usnay kaha. “ wo dekho wo bethi hay kambaqt! Chalo sab milkar uspar hamla kartay hain. Ab dekhtay hain ke kaisay bachkar nikalti hay.” Ek doo teen ke saat hi bahut se phattar gulayloun se nikalkar uss beybass kamzoor chidya ki taraf chalay laykin doosray hi lamhay chidya ek baar phir se udhgayi. Iss se pehle ke shareer ladkay uska mazeed pechaa kartay, wahan ek ajeeb si baat huwi. Yakaayak youn laga jaise unpar kisi taraf se jawaabi hamla huwa hay. Itni daer se unki taraf itni bahutsi kankariyaan aayi ke unki cheeqein nikalgayi, abhi wo sambhalne bhi nahi paaye thay ke unhi youn laga jaise unlimited ants unsay chimat gaye. Ab to un sab ki jaan nikalgayi aur wo cheeqtay chillatay, ulthay paaoun sheher ki taraf bhaagne lagay laykin wo pur israar ants thay ke unsay chimath gaye thay aur barabar unka follow karrahe thay. Udhar sheher ke kuch loogoun ne dekha ke bahut se bacche sarpat bhaage aarahe thay aur buri tarah cheeq rahe thay. “HELP! HELP!, allah ke waastay hamari madad karo.”
Unki cheeqein sunkar bahut se gharoun se loog nikal aaye aur badi mushkil se unki jaan bachaayi. Huwa ye tha ke jiss daraqt ki tehni par uss nanhi si chidya ne panah li huwi thi, uspar shehed ki makkhiyoun ka ek bada chatta tha, unn ladkoun ne bagair dekhe gulayl chalaayi tou unkay phattar chidya ke bajaaye uss chattay ko lagay jiss par jhinjhilaakar shehed ki makkhi(HONEY BEE) ne unpar hamla kardiya.
Iss waaqiye ke baad kayi din tak inn shareer bacchoun ke mooh, haath aur payr soojey rahe aur ye ladkay din, raat takleef se bil’bilaatay rahe. Uss din ke baad shahid aur uskay friends ne taubah Karli. Unhoo ne phir na kabhi gulayl ko haat lagaaya aur na kabhi kisi ma’soom parinday ko sataaya. Itni takleef uthaanay ke baad unhi ehsaas hoogaya ke shafeeq ki baatein kitni sacchi thi, ab tamaam dost shafeeq ki taraf hookar ek acchi zindagi guzaarne lage thay.